日職周中開快車，由川崎前鋒主場迎戰神戶勝利船，位處積分榜下游嘅川崎前鋒表現硬淨，近6場聯賽取得1勝5和，可見要擊敗佢哋，並非易事。加上神戶勝利船狀態走下坡，已連續兩場失分，讓波有暗湧，寧願博川崎前鋒讓球主勝。■（無綫myTV聽SUPER周三晚6時直播）
川崎前鋒近年演出每況愈下，今季成績進一步倒退，踢24場聯賽僅6勝，失咗大量分數。不過，爛船都有三斤釘，即使川崎前鋒勝出率低，但近6場聯賽保持不敗，包括主場打和兩支前列球隊廣島三箭、大阪櫻花，所以今仗有地利優勢支持下，應該可以同神戶勝利船抗衡。
勝利船作客表現曳
另邊廂，神戶勝利船雖然排第4位，但狀態只屬一般，近10場聯賽只有3勝4和3負，包括上輪主場被名古屋鯨魚逼和3比3，防線甚為不穩。同埋近5場聯賽作客僅1勝2和2負，恐怕冇本錢讓波，川崎前鋒有力坐和望贏。